Вие сте тук

Житие на св. Методий от Простия пролог

Маіѧ аi. Въ тьжь дьнь памѧть прѣподобнаго отца нашего Мефодиꙗ, ѥпископа Моравьскаго

Прѣподобныи отець нашь Мефедии бѣ от града Селѹньскаго, от сановитѹ и богатѹ родителю рожии сѧ, отца Льва и матери Марiи. Бѣ же изъ ѹности ѹноша мꙋдръ бесѣдою, крѣпокь тѣломь. Тѣмь и знаѥмь бѣ цареви: имѣꙗше ѥго царь всегда предъ собою.

Ѥгда же бысть в͠і лѣть постави ѥго кнѧземь въ Словѣнѣхъ. И пребывъ тамо і҃ лѣть, извыче ꙗзыкь словеньскыи. И помысливь скороминѹщеѥ житиѥ вѣка сего и долгоѥ грѣшныхь мѹчениѥ, и ѹмили сѧ въ страхь божии, положивъ ѧсанъ кнѧжениꙗ предь царемь, и шедь на Алумьбескѹю горꙋ, и бысть мнихъ.

Нѣкогда же посла царь брата ѥго Кюрила въ Козары, да преприть жиды и иженеть ꙗꙗ от землѧ ихъ. Бѧхѹ бо ѹже Козарии приꙗли жидовьскꙋю вѣрѹ. Кѹриль же ѹмоли брата своѥго Меѳедиꙗ, ити съ собою, ѧко ѹмѣꙗше ꙗзыкь словѣнеськь. Обидоша же всю странѹ тꙋ, и силою Христовою всѧ людїи ѹвериста и жиды прогнаста. Просѧхѹ же словени кръщениꙗ, а Козарии ѹчителѧ, а Моравлѧне ѥпископа, а болгарѣ ѹчителѧ же и наставника.

Възвратившю сѧ Меѳедию въ Костѧнтинь градь, патриархь же свѧти ѥго ѥпископа, посла въ Моравѹ въ градь Каонъ. И тѹ многа створи чюдеса. Замбри же нѣкто родомь Козаринъ, а вѣрою ѥретикъ, нача противити сѧ Меѳедию, хѹлѧ Христовѹ вѣрѹ. И повелѣ кнѧзь Моравьскыи быти сборѹ. И собра сѧ съ Замбриѥмь в҃ мѹжь, Меѳедии же ѥдинь прииде посредѣ ихъ. Ꙗко ополчиша сѧ хѹлами на свѧтѹю Христовѹ вѣрѹ. Меѳедии же, ꙗко изѧщенъ борецъ пророчьскыми и апостольскыми словесы, ꙗко славень воинь на обѣ рѹцѣ стрѣлѧꙗ, на жиды же и на ѥретикы, никакоже не погрѣшаше. И ꙗко препрѣни быша отъ Меѳедиꙗ, ствари сѧ чюдо велико: Замьбрии убо расѣде сѧ, а Седислава пожре землѧ, и въ прочихъ же възгорѣ огнь; и тако разбѣгоша сѧ. Ради же быша христиꙗне и нарекоша и ѹста Христова.

Пожив же въ старости добрѣ, и престави сѧ кь Богѹ.

Препис: 

ГИМ, Усп. 3, 1405 г. – Теодоров-Балан 1934: 38-39

Библиография: 

Кирилъ и Методи

Теодоров-Балан, Александър, авт . 1934. Кирилъ и Методи. Университетска библиотека № 146, редица “Помагала”, брой 3. Том 2. (Университетска Библиотека № 146, Редица “Помагала”, Брой 3). София: Придворна печатница.
Транскрипция: 
Ана Стойкова